Heb 6 | WSK | STEP |

Hebrews 6

Ana nangamang ningi nunguning ilukuawunakko

Buta se anananga ikia mu kariimet garuk sinar ago wore iwita sanamanakko sail taginakko. Agi kari kawam kalosan mu nuna ngatalek bangaru se lagasan i? Mena. Mu nuna ngatalek i warsan asele ko awete kawam kalosan. Mu turantala, ana Kris nanga den bibiya wetang te giriman ikiman mu ngatalek bangaruwara iwita, se ana me ko munaka se laganakko.

Den bibiya girisan bangorsan mu iwita: munan memek nabiring tua ale giris palaga ko den, Kaem ko nangamang ningi nunguning ko den,2 anuwa tata duap duap ko den, nagiting saki alo nusupuling te awura ko den, kuera ale barasa ko den, tutera se saki pempem ningo bagomonko se saki pempem memek bagomonko ko den. Bare ana den umutang ko me munaka se laganakko. Ana ko awete mu den saki aora nuam mu am karogo ko ikinakko. 3 Se Kaem nanga sanguk mu uwutata betenakko.

4 Bare arikaya den gilalong yawara ko ikiman ale nungamin sinar uriam, ale duruk wonong ko munan mu aringiman ko ikiman, ale Korang Bur taman, 5 ale Kaem ko den mu yawarakala mu ko ikiman, ale Kaem ko sokel tom udagi ninguru aratukko mu nuna aringiman, 6 bare nuna Kaem nubiring tuman, mu kariimet umutang aking giris palagomon ale Kaem kote pelemonko lage mena. Mu awuk, nuna nunga munan umutang te Kaem ko Namar udagi nunguningkiri tam kangono te tagisan, ale kariimet saki nomotam te dolara tua iwita betesan.a

7 Ali tuwik awete kaposo se ali umutang tuwik ko yu mu ninguru naso, se sume galuk te asursan mu nunguning ninguru kaposo, se Kaem ali mu ko amilmiloso ale marak tuso. 8 Bare ali tuwik awete kaposo, bare mayang kore ago se sirsir memek te tarigiso, ali mu ningo mena. Se Kaem baluk se ali mu memek taukko mu ko tom tai pingi aram. Mu ali mu kani namurukko.

9 Nanga singsang yawara, ana den uwutata balman, bare ana ninga ikisan nina mu uwutata mena. Kaem ninga giam, ale nu ninga sanguk se yawarakala bagaralko. 10 Kaem mu munan diram beteso. Ale nu ninga ura betesan mu ko me kuamili sapurukko. Mu nina noko kuesan umutang ko, nina ninga Kris kariimet saki nunga sangaru lagaman. Aking aitak nunga sangaruwasan. Se nu arigam ale mu ko me kuamili sapurukko. ^{▼▼Heb 6:9-10 Hebrew alo munan ningo saki bitakasan: Heb 10:32-34.} 11 Se anananga nangamang mu, nina suwan suwan uwutatala bita se bagaral nama asele den nina ko nengemang ningi nunguning aram mu ko nunguning arigalko. 12 Buta se nina me gagoraralko, kariimet nongomang ningi nunguning te namawa, namawa, Kaem den nunga maonam mu ko nunguning arigisan mu nunga turan bagaralko.

Kaem ko den mu nunguningta, se ko nangamang ningi nunguning arukko

13 Tom Kaem Abraham ilak den nungam, mu nu kota ko nup te den mu sokel tuam. Mu awuk, kari bo nu ko kualala baguruk se ko nup te den mu sokel tuokko mena. Nu kota biya. 14 Se nu iwita Abraham maonam, “Ani nunguningta marak kisek, ale ka kuriang ka taleng girigir suen biya nunguningkiri kisekko.” ^{▼▼Heb 6:13-14 Kaem Abraham ilak den nungam: Genesis 22:16-17.} 15 Se Abraham gomang ningi nunguning te kimi bitawaram la, Kaem ko den ilak nungam mu ko nunguning aratam se arigam.

16 Kari nunga den sokel tumonko mu, kari bo biya nunga kualala bagoso mu ko nup te den balsan, se nunga den mu nama au kaposo, se nunga singsang ko aguwaya balmonko mu mena. 17 Se Kaem betela ko den Abraham maonam mu kota ko nup te sokel tuam, mu awuk, kariimet den mu ko nunguning udagi aringimonko wore te ninguru ikimon, nu ko ikia me gurugokkowo ma balmonko. 18 Kaem nu kawelurukko me terong. ^{▼▼Heb 6:18 Kaem nu kawelurukko me terong: Num 23:19. Nu ko ikia me guruguso patawoso: 1 Sam 15:29.} Se mel ilagala, noko den balam, ale aking nunguningta nunguning mam, mu ana awiriya nu nanga sangaru taukko kote pingi namaman mu nanga nangamang sokel ninguru tuok, se den mu ko nunguning aringinakko mu gek am tala kimi bita se baganakko.

19 Den ana ikiman ale ko nangamang ningi nunguning aram mu manga aora garagar owore iwita, sokel nangarso se te gek am sanamasan ale bagasan. Se nangamang ningi nunguning umutang te ana guang ilu kagorsan ale Kaem ko kuwim kako nunguningkiri mu te kote kasu nagusan. ^{▼▼Heb 6:19-20 Guang barukuam: Mat 27:50-51.} Jesus nanga sangukko maingkala guang barukuam ale kuwim mu ningi giram kasu naguram. Mu awuk, nu Melchizedek iwita, nu tom suen biya ko priest supuling ko aratam bagoso.

20